Zuma se seun in sop oor ‘wit honde’-uitsprake

0
178

Die Menseregtekommissie (MRK) het Vrydag gesê hy gaan daadwerklike stappe doen teen president Jacob Zuma se seun, Edward Zuma, nadat hy homself skuldig gemaak het aan rassisme en haatspraak in ʼn brief wat gerig is aan Derek Hanekom en Pravin Gordhan.

In die brief, wat intussen deur sommige media gepubliseer is, sê Zuma dat Gordhan, die voormalige minister van finansies, en Hanekom, die voormalige minister van toerisme, aan wit mense “uitverkoop” is.

Zuma sê onder meer dat Gordhan wit mense sal verdedig, terwyl hy nie dieselfde vir ander kulture sal doen nie. Volgens hom is Gordhan een van die mees korrupte lede van die ANC, en maak hy hom daaraan skuldig dat hy glo swart mense is net “snyers van suikerriet”.

Hy sê ook dat Hanekom “niks beter is as ʼn walglike hond wat geleer is om swart velle te verskeur” nie.

“Gordhan het bewys hy het ʼn minderwaardigheidskompleks teenoor wit mense, maar is meerderwaardig teenoor mense van ander kulture. Hy glo dit is ondenkbaar dat mense inheems van Afrika [swart mense] in ʼn hoër klas as ander rasse is. Hierdie bevoorregte seun van die Sastri Kollege het bewys dat hy wit mense en hul aangestelde ‘krummeleters’ sal beskerm, sowel as dié agter wit monopolie. Beide Derek Hanekom en Gordhan het breedvoerig op witmonopolie-mediaplatforms teen die groter meerderheid van die ANC-lede, insluitend die president van Suid-Afrika, uitgevaar.

“Beide van dié leiers is witmonopolie-voorstanders, wat ook teen die regerende party is, en het programme wat deur die ANC uitgewerk is om die lewe van swart mense in Suid-Afrika te verbeter, teëgewerk,” skryf hy.

Gushwell Brooks, ʼn woordvoerder van die Menseregtekommissie, het gesê dié organisasie sal teen Zuma optree, en sal hom ook beveel om gepas om verskoning te vra.

“Die kommissie is bekommerd dat sulke stellings in die breër konteks van haatspraak, veral op grond van ras, deur individue met ʼn openbare platform gemaak word,” het Brooks gesê.