Seun (14) se geliefde hond sterf ná ‘opsetlike’ veghondaanval

0
69
ʼn Jong seun van George is hartgebroke gelaat ná sy geliefde hond, Roché, vandeesweek van kant gemaak moes word nadat sy onverwags deur pittbulls aangeval is.

Ei-Lermo Erasmus (14) was Maandag oudergewoonte saam met ʼn groep van sy vriende op pad na die Tuinroete-dierebeskermingsvereniging (DBV) om kos vir hul honde af te haal en hulle te laat dip toe die eienaars van ʼn groep pittbulls hul honde glo opsetlik aangepor het om sy hond aan te val.

Volgens Gerda Reynders, woordvoerder van die plaaslike DBV, was die seuns se honde aan leibande wat die DBV vroeër aan hulle verskaf het, maar die pittbulls was nie.

.

“Ons glo [die aanval] was beslis opsetlik. Die eienaars van die pittbulls het onmiddellik ná die aanval weggehardloop. Dit is net sy hondjie wat aangeval is,” het Reynders verduidelik.

Ei-Lermo het Roché, wat erg beseer was, in ʼn krat tot by die DBV gedra. Volgens Reynders was haar beserings net té ernstig en moes hulle haar ongelukkig van kant maak.

Sy het gesê Ei-Lermo en sy maats bring gereeld hul honde om gedip te word en om kos te gaan haal vir die honde.

Reynders het gesê daar is nie in dié stadium ʼn saak by die polisie aanhangig gemaak teen die eienaars van die pittbulls nie, maar dat die DBV beslis van voorneme is om die saak verder te neem sodra hulle die eienaars opspoor. “Ons soek na hulle. Dis egter ʼn baie groot gebied,” het sy gesê.

Daar het sedertdien ʼn storm op die Tuinroete DBV se Facebookblad losgebars oor pittbulls, met talle sosialemediaverbruikers wat dié honderas veroordeel. Reynders het egter gesê dit is nie die honderas wat veroordeel moet word nie, maar die optrede van die honde se eienaars.

Mense het intussen ook na Ei-Lermo uitgereik om hom by te staan ná die traumatiese ervaring. Volgens Reynders sal die DBV vandag die hondehok en hondekos wat mense aan Ei-Lermo geskenk het vir Roché se ma, Queen, neem. Ei-Lermo het slegs ʼn dag ná die aanval vir Queen na die DBV geneem om gesteriliseer te word.

Enigiemand wat vir Ei-Lermo of die DBV wil bystaan, kan 044 878 1990 skakel.