Boer met pik aangeval op kleinhoewe

0
94
ʼn Boer van Mpumalanga is per helikopter na ʼn hospitaal in Johannesburg gevlieg nadat hy Saterdagoggend op ʼn kleinhoewe buite Emalahleni (Witbank) met ʼn pik aangeval is.

Mike Botha (45) is omstreeks 08:00 op die kleinhoewe tussen Witbank en Middelburg, waar hy met groente boer, aangeval. Hy het ernstige wonde aan sy bene opgedoen, asook snywonde aan sy hande soos hy homself probeer verdedig het.

Willem Botha, Mike se broer, het aan Maroela Media gesê ʼn goeie vriend van Mike en sy dogter het op die kleinhoewe gekuier toe die aanval gebeur het. “Soos ons verstaan, het die vriend en sy dogtertjie, wat omtrent so sewe jaar oud is, uit die huis gestap na ʼn plek waar Mike varkies aanhou. Die twee mans het hulle oorval, maar die vriend kon daarin slaag om hulle af te weer. Hy het net sy dogtertjie gegryp en gehardloop,” het Willem gesê. “Toe Mike uitkom, het die aanvallers hom oorval.”

Volgens Willem was die aanvallers twee van Mike se werkers. Hulle het Mike in hul woonkwartiere naby die huis ingesleep en hom daar aangerand. Die aanvallers het met Mike se wit Ford Ranger-bakkie, selfoon, beursie, vuurwapens uit die kluis en verskeie huishoudelike items op die vlug geslaan.

Mike is Saterdagmiddag per helikopter na die Netcare Garden City-hospitaal in Johannesburg geneem, waar hy geopereer sal word.

Marius Müller, nasionale operasionele koördineerder van AfriForum, het gesê ʼn soektog na die aanvallers is van stapel gestuur, maar niemand is nog in hegtenis geneem nie.

Brig. Leonard Hlathi, woordvoerder van die polisie, het die voorval aan Maroela Media bevestig. Hy het gesê sake van voertuigdiefstal en aanranding met die doel om ernstig te beseer word ondersoek. Volgens Hlathi kon Mike se voertuig nog nie opgespoor word nie.